ದೇಶ ಭಕ್ತಿ ಗೀತೆಗಳು

ಧವಳ ಹಿಮದ ಗಿರಿಯ ಮೇಲೆ

ಧವಳ ಹಿಮದ ಗಿರಿಯ ಮೇಲೆ ಅರುಣ ಧ್ವಜವ ಹಾರಿಸಿ 

ಮುಗಿಲ ಏಣಿ ಏರಿ ನಿಂದು ವಿಜಯಭೇರಿ ಬಾರಿಸಿ //ಪ//

ಸಿಂಧು ಕಣಿವೆಯೊಡಲಿನಿಂದ ವೀರಗಾನ ಮೊಳಗಲಿ 

ಧ್ಯೇಯರವಿಯ ಕಿರಣ ತರುಣರೆದೆಯ ಗುಡಿಯ ಬೆಳಗಲಿ 

ಎದ್ದು ನಿಲ್ಲು ಭಾರತ...  ದಿವ್ಯಪ್ರಭೆಯ ಬೀರುತ //೧//

ಮನವ ಹಸಿರುಗೊಳಿಸುತಿಹಳು ಭಾವಗಂಗೆ ಅನುದಿನ 

ಇಳೆಯ ಕೊಳೆಯ ತೊಳೆಯುತಿಹಳು ತಾಯಿ ತುಂಗೆ ಕ್ಷಣಕ್ಷಣ

ನೆಲವಿದೆಮ್ಮ ಪಾವನ...  ಎನಿತು ಧನ್ಯ ಜೀವನ //೨//

ನಾಡಗುಡಿಯ ಮೂರು ಕಡೆಯ ಪೊರೆವ ಶಾಂತಸಾಗರ
ಹಿಂದೂ ಜನರ ಹೃದಯವಿಂದು ಕ್ಷಾತ್ರತೇಜದಾಗರ
ಸ್ಪೂರ್ತಿ ಗೌರಿಶಂಕರ... ಕಾಲಯಮನು ಕಿಂಕರ //೩//

ಅಸುರತನದ ಉಸಿರ ನೀಗಿ ಭೇದಭಾವ ನೀಗುತ
ಸಾಗು ಮುಂದೆ ಮುಂದೆ ಸಾಗು ಮಾತೆಯನ್ನು ಸ್ಮರಿಸುತ
ನಿನಗೆ ಜಯದ ಆರತಿ... ಹರಸು ತಾಯೆ ಭಾರತಿ //೪//


*******************************************************************************